Опубликовано: 07 September 2017

А.В. Бречалов мерлыко огазеяськонъёсын пумиськиз

4-тӥ куарусёнэ Калыкъёслэн Эшъяськон юртазы Удмурт Элькун Тӧролэсь ужзэ огдырлы быдэсъясь А.В. Бречалов егитъёсын но элькунысь мерлыко огазеяськонъёслэн ёзчиосынызы пумиськиз.

Нырысь Александр Владимирович терроризм сярысь вераськыны ӵектӥз, угось сое палэнэ кельтыны уг яра. Та кышкытлык асьмелэн элькунамы но лыктыны быгатэ. «Асьмелы терроризмен нюръяськыны сюрес утчано, бӧрысь кайгу адӟоно медам луэ шуыса», - пусйиз А. Бречалов. Озьы ик кивалтӥсь егитъёсын ужанлэсь форматсэ воштыны ӧтиз. Вотэсбамын туж трос огинлыкъёс, соос огазеяло олокӧня сюрс адямиосты. Соослэн кивалтӥсьёссы зэмос профессионалъёс, кудъёсыз быгато егитъёслэн йырвизьмазы кулэ луись валатонъёс пыӵатыны, оскытыны соосыз. Егитъёс асьмелэсь малпанъёсмес мед валалозы шуыса, соосты выль кабен лэсьтоно. Пӧртэм пумо буклетъёс, 12 кеглен гожтэм текстъёс туала егитъёслы тунсыко ӧвӧл ни. Кулэ контрповестка.

Кивалтӥсен ӝутэм юанъёсты аслаз вераназ азинтӥз М.А. Царева, элькунысьтымы егитъёслэн огазеяськонъёссылэн «Вместе» Ассоциацизылэн координаторез. Мария Алекссевна ивортӥз нылпиос но егитъёс пӧлын терроризмлы пумит уж нуон сярысь.

Бӧрысь вераськон выжиз юанъёс борды, кудъёсыз пумысен кенешизы азьвыл пумиськонын. Александр Бречалов тодэ вайытӥз, 2020-тӥ арын элькунмылэн кунлык басьтэмезлы 100 ар тырмонэз пусъён вылысь туэ пӧстолэзе оргкомитет но ужан группа кылдытэмын шуыса. Ужан группае пыремын мерлыко огазеяськонъёслэн кивалтӥсьёссы, лулчеберет но история удысысь экспертъёс, ужбергатӥсьёс, министръёс, иворчиос. Котырес лыдпуслы Йӧскалык лыдӟетъюртэз лэсьтыны, Удмурт лулчеберетъя центрез усьтыны, М.Т. Калашников нимо проспектэз тупатыны чакламын. Мерлыко огазеяськонъёслэн ӵектонъёссы планэ пыртэмын. Котькудзэ соосты ужан группа рос-прос эскероз 7-тӥ куарусён толэзе. Ӵапак соку ик висъялозы тужгес но кулэ луись ужрадъёсты.

Удмурт Элькунысь йӧскалык политикая министрлэсь ужзэ быдэсъясь Л.Н. Буранова Удмуртиын йӧскалык гурт кылдытон сярысь вераз. Туннэ нунал понна ужан группа эскериз, кызьы быдэстэмын та выллем ӵектосъёс мукет улосъёсын, пумиськылӥз экспертъёсын. Гуртэз интыянъя пӧртэм интыос ӵектэмын: «Лудорвай» музей котыре, «Байкал» бизнес-центр сьӧры, зоопарк вӧзы. «Йӧскалык гуртлэн азинтӥськемез уте тӥлесьтыд гинэ, - вазиськиз Александр Бречалов мерлыко огазеяськонъёслэн ёзчиоссылы но егитъёслы. – Со - калык ӵектос. Тӥ тодыны кулэ кызьы сое быдэстоно. Ойдолэ ӵошен малпаськоме».

Повесткаысь юанъёсты эскерем бере, люкаськемъёслэн луонлыксы вал кивалтӥсьлы юанъёссэс сётыны. Ёросъёсысь лыктэм егитъёс но егитъёсын ужась ӧнерчиос юалляськизы егитъёсыз уже интыян, ужрадъёсты ортчытъян, элькунлэн огъя азинтӥськемез сярысь.

Александр Бречалов котькуд юанлы валэктон сётӥз. Нимысьтыз пусйиз на, егитъёс асьсэос кичӧлтон сётыны кулэ шуыса. Элькунысь но интыысь кивалтэт юртозы быдэстыны малпанъёссэс. Вераны кулэ на, одӥг ужпумез пумиськонын ик быдэстыны луиз. Можга ёросысь егитъёс ӝожтӥськизы вал коллективлы йӧскалык дӥськут кулэ шуыса. Удмуртиысь таджикъёслэн огазеяськонзылэн кивалтӥсез Мирзо Умаров та ужпум борды басьтӥськыны дась луэмзэ вераз.



Информационно-аналитическоe управление Администрации города Ижевска © 1998-2017г.

При любом использовании материалов сайта ссылка на www.izh.ru обязательна
вход авторов,