Опубликовано: 10 July 2017

"Сабантуй" шулдыртӥз Сарапулэз

8-тӥ пӧсьтолэзе Акшабариха шур дурын бигер но башкир калыкъёслэн «Сабантуй» шулдыръяськонзы ортчиз.

Шур дурысь возь вылэ элькунмылэн пӧртэм ёросъёсысьтыз, озьы ик бускель Татарстан но Башкортостан улосъёсысь делегациос вуизы. 8-тӥ пӧсьтолэзе семьялэсь нуналзэ пусйиськомы бере, шулдыръяськонлэн но валтӥсь темаосыз семья, яратон, ог-огдэ гажан вал.

Праздник кутскиз Эшъяськон ураме пуксем пӧртэм йӧслыко семьяослэн азбаръёсынызы тодматсконысен. «Йӧслыко семья – калыклэсь сям-йылолъёссэ утись» вожвылъяськонэ пыриськись семьяос ӵыжы-выжызылэсь историзэ возьмтӥзы.

Та нуналэ калыкез ӟечкыланы вуизы Удмурт Элькун Кивалтэтлэн Тӧроезлэсь ужзэ быдэсъясь Виктор Савельев, Удмурт Элькунысь Кун Кенешлэн Тӧроезлэн воштӥсез - Коньдэтъя, вытъёсъя но коньдон ужпумъёсъя ялан ужась ӧрилэн кивалтӥсез Софья Широбокова. Удмурт Элькунысь йӧскалык политикая министрлэсь ужзэ быдэсъясь Лариса Буранова, «Сарапул кар» муниципал кылдытэтлэн Тӧроез Александр Ессен.

«Элькунамы радъяськись котькудӥз йӧскалык шулдыръяськонлэн кулэлыкез туж бадӟым, малы ке шуоно, ӵапак татын калык возьматэ ассэ, ас калыкезлэсь сям-йылолъёссэ гажамзэ, утьыны быгатэмзэ. Шулдыръяськонын калыклэн этно пространствоез туж зол шодиське но адӟиське. Туж умой, туннэ татчы пӧртэм выжы калыкъёс лыктэмын шуыса, угось калыклэн мукетъёслэсь пытсаськыса, ватскыса улэмез ӟечлы уг вутты», - вераз аслаз вазиськоназ Удмурт Элькунысь йӧскалык политикая министрлэсь ужзэ быдэсъясь Лариса Буранова.

Калык понна, котьку сямен, трос пумо азбаръёс ужазы. Тужгес трос калык люкаськылӥз спортэн герӟаськем площадкаосы: Көрәш, гир ӝуткан, волейбол, дартс. Калык шудонъёсын то шумпотыса шудӥзы куноос: мешокен ӝугиськон, юбое тубан но мукет.

Праздник ӵоже ужаз кибашлыослэн киужъёсынызы вузкарон-адӟытон. Йылпумъяськиз Сабантуй «Көрәш» нюръяськонын вормись батырез данъянэн но солы така сётонэн.



Информационно-аналитическоe управление Администрации города Ижевска © 1998-2017г.

При любом использовании материалов сайта ссылка на www.izh.ru обязательна
вход авторов,