Опубликовано: 10 July 2017

Москаваын "Гербер" шулдыръяськон ортчиз

1-тӥ пӧсьтолэзе Москваын, «Эрмитаж» садын, удмурт калыклэн «Гербер» шулдыръяськонэз ортчиз. Туэ радъясьёс выль формат малпазы. Праздниклэн девизэз луиз - «Лэсьтэмын Удмуртиын» но «Тодматскы Удмуртиен, Москваысь кошкылытэк».

«Удмуртъёс дунъяло но утё асьсэлэсь лулчеберетсэс но сям-йылолъёссэс. Гербер - одӥгез валтӥсь шулдыръяськон луэ. Туж умой сое Москваын ортчытон сямлы пӧрмиз ини шуыса <…> Тау карисько Москвалэн Кивалтэтэзлы элькунъёслы но улосъёслы ужрадъёс ортчытыны площадка сётэмез понна. Россиын улӥсьёс мед тодызы макем узыр но пӧртэм асьмелэн кунмы. Мед тодозы маин висъясько но данъясько улосъёс, мед тодозы калык сям-йылолъёсты но лулчеберетъёсты. Адямиос ӵемысь Удмуртиез но Ижевскез Калашников автоматэн но ож удысысь мукет тӥрлыкъёсын гинэ герӟало. Нош Удмуртия – со бадӟым луонлыкъёсын улосвыл. Туннэ татчы люкамы мае милям тужгес но возьматэммы потэ Москвалы, Россилы, быдэс дуннелы. Ми валаськомы идеологиез воштоно шуыса. Воштоно сое калык сямъёсты тӥятэк. Удмуртия - со быдэс дуннелэн луюкетэз. Соин ик ми золгес ужаломы йӧскалык ужъёс бордын, лулчеберетлы, искусстволы бадӟым саклык висъяломы», - вераз Удмурт Элькун Тӧролэсь ужзэ огдырлы быдэсъясь А.В. Бречалов.

Герберын 10 азбаръёс ужазы: «Удмурт шӧм», «Тодматскы Удмуртиен», «Кылзы Удмуртиез», «Удмуртилэн данэз», «Лэсьтэмын Удмуртиын», «Усьты Удмуртиез», "Шуды Удмуртиен", «Удмуртиысь салам», «Йӧтӥськы Удмуртия борды», «Удмуртиез сюлмад кельты».

Туэ шулдыръяськонын нырысьсэ шахмат турнир радъямын вал. Огдыре шудон сеансэз нуиз шахматъя Россилэн кык пол чемпионэз, Олимпийской шудонъёслэн куинь пол чемпионэз Александр Морозович. Нош Ижкарын ортчем шахматъя турнирын вормисьёслы пумит шудӥз ӝог шахматъя дунневыл чемпион Сергей Карякин.

«Шуды Удмуртиен» азбарын Удмуртиысь дано куасэн бызьылӥсьёсын Галина Кулаковаен, Тамара Тихоноваен но биатлонистэн Иван Черезовен пумиськон ортчиз. Спортсменъёс мадизы кызьы соос спортэ вуизы, кызьы вормонъёссы доры мынӥзы.

«LADA Ижевск» автозавод возьматӥз выль машинаоосэ, нош «Калашников» концерн мылкыд карисьёслы тодмо автоматэз сэрттыны-люканы луонлык кылдытӥз. Чайковскийлэн музей-юртэз но "Кванториум" нылпи технопарк ӵошен лэсьтэм ӵектосэнызы, музейя виртуальной турен но "Чайковский.LIVE" приложениен, тодматӥзы. Та приложенилы луыса музейысь экспонат сярысь ватсаса ивортодэт басьтыны луэ. Со понна смартфонлэсь камеразэ экспонат вадьсы кароно. Ог-огзэсты яратӥсьёслы кузьым луиз куран но айшон дӥсян йылолъёсын тодматскон.

Люкаськем калыкез шулдыртӥзы фольклор кырӟанъя но эктонъя «Айкай» кун театр, «Прага live» кавер группа, «Детская новая волна-2017» ӵошатсконлэн вормисез Арина Петрова, рок кырӟась Татьяна Зыкина но мукетъёс.

Удмуртиысь фермеръёслэн вузкаронзы, калык сиён-юонэз оскалтон, туала удмурт шӧмо дӥсен тодматскон, киужъёсъя мастер-классъёс, Лӧпшо Педунень но Тол Бабаен шудон, калык коллективъёслэн но туала кырӟасьёслэн кырӟанъёссы, егитъёслэн позыряськонзы, интерактивной мастер-классъёс но ӵошатскон-вожвылъяськонъёс, удмурт кылын тодматскон – ваньмыз та Москваны ортчиз. Гербер Удмуртилэн туризм, лулчеберет но экономика быгатонлыкъёсыныз тодматон бадӟым площадкалы пӧрмиз.  



Информационно-аналитическоe управление Администрации города Ижевска © 1998-2017г.

При любом использовании материалов сайта ссылка на www.izh.ru обязательна
вход авторов,