Опубликовано: 31 May 2017

Выжы-выжы-выжыкыл

29-тӥ куартолэзе Удмуртиысь калыкъёслэн эшъяськон юртазы «Выжы-выжы-выжыкыл» III элькун нылпи фестивальлэн йылпумъян люкетэз ортчиз. Отын Удмуртиын улӥсь калыкъёслэн выжыкылъёссыя пуктэм 9 возьматонъёсын тодматӥзы.

«Выжы-выжы-выжыкыл» вожвылъяськон-фестивале каръёсысь но ёрос центръёсысь удмурт кылэз, удмурт йылолъёсты дышетӥсь нылпи садъёс пырисько. «Удмурт нылкышно кенеш» огазеяськон ужрадэз нырысь ик Ижкар понна кылдытӥз вал, но куинетӥ арзэ ни со элькун инлыкен мынэ.

Ижкарысь 100 номеро нылпи садысь пиналъёс фестивале нырысьсэ пыриськизы. Соос Римма Николаевалэсь «Паймымон сяртчы» выжыкылзэ пуктӥзы. Пуштросэз ӟуч выжыкыллы матын, но геройёсыз пӧртэмесьгес.

Нылпи садэ ветлӥсь пиналъёс пӧлын удмурт кылэз тодӥсьёс ӧвӧл, шуэ визьнодась Марина Чиркова. Возьматонзэс дасяны куинь толэзь выризы. Анайзы яке атайзы удмурт кылэз тодо ке, нылпиослы кылъёсты дышетыны капчигес, мукетъёсызлы секыт йӧтэ. Озьы ке но пуктэм выжыкылзы устоосыз пӧлы шедиз.

«Мон ачим удмурт бере, одӥг-кык кылъёсты вераллясько. Ӟечбуръяськисько пиналъёсын, ужысь кошкыку ӟеч луэ шуисько. Соослы туж тунсыко луиз, соос юалляны кутскизы, «кыӵе кылын тӥ вераськиськоды». Мон шуисько — удмурт. <…> Шудонъёсын сямен милям пӧрмыны кутскиз, пиналъёслэн синъёссы ӝуаны кутскизы. Собере малпасько, ойдолэ пуктом таӵе выжыкылэз. Мон шедьтӥ со юри дасям выжыкылэз, со ӵапак садикъёслы дасямын. Пуктӥм, пиналъёслы яраськиз но соос юн шумпотыса та выжыкылэз адӟыто», — вераз Марина Чиркова.

Таяз арын фестивальлэн нырысетӥ люкетаз 10 площадкаосын 35 выжыкыл возьматӥзы. Ваньмыз соос удмурт кылын пуктэмын. Покчиос визьнодасьёсынызы ӵош ӟуч, удмурт, бигер, пор, украин, белорус, чуваш, мордва, манси калыкъёслэсь выжыкылъёссэс дасязы.

«Татын, Удмуртиын, улӥсь калыкъёслэсь выжыкылъёссэс возьматӥськомы удмурт кылын, кун кылын кадь шуыса, нырысетӥез. Кыкетӥез, <…> та проектмы нимысьтыз малпамын удмурт кылэз дышетӥсь пиналъёс понна, кудъёсыз пӧртэм выжыосысь. Тросэз ӟуч семьяосысь пиналъёс. Но соос сыӵе чаляк дышо удмурт кыллы! <…> Соин ик кышкано ӧвӧл удмурт кылэз пыртыны», — пусйиз «Удмурт нылкышно кенеш» огазеяськонлэн тӧроез Надежда Степанова.

Фестивале пыриськисьёсты таяз арын нырысьсэ выль ӧръёсъя пусйизы. Выжыкылэз тужгес усто берыктэм понна данъет басьтӥз Ижкарысь 269 номеро нылпи сад. Тужгес усто сценариеныз висъяськиз 195 номеро нылпи сад. «Режиссерлэн устоез ужез» номинациын синйылтӥзы 135 номеро нылпи садэз. Со сяна, Ижкарысь 16 пиналъёсты рользэс тужгес быгатыса шудэмзы понна пусйизы.

Ватсалом, «Выжы-выжы-выжыкыл» нылпи фестивалез радъя «Удмурт нылкышно кенеш» огазеяськон Удмуртиысь йӧскалык политикая министерство, Калыкъёслэн эшъяськон юртсы, «Удмурт Кенеш» огазеяськон юрттэм улсын.

http://udmurt.media/udm/news/kultura-i-turizm/20077/



Информационно-аналитическоe управление Администрации города Ижевска © 1998-2017г.

При любом использовании материалов сайта ссылка на www.izh.ru обязательна
вход авторов,