Опубликовано: 20 June 2016

Ижкарын ортчизы Россия кунмылэн но Элькун шоркармылэн нуналъёссылы сӥзем шулдыръяськонъёс

Арысь аре 12 инвожое ижкар улӥсьёс карзылэсь нуналзэс пусъё. Вазь ӵукна ик Оӵ шур вылын интыяськись кортпоттон заводлэн мытӥсезлы Пётр Шуваловлы сӥзем синпелет азьын сяська вӧлдон ортчиз. Собере Ижкарысь оружейной заводлэн мытӥсезлы Андрей Дерябинлы сӥзем синпелет вӧзын митинг радъямын вал.

Россия кунмылэн нуналэзлы сӥзем шулдыръяськонъёс Калыкъёслэн эшъяськон монументсы котырын мытэмын вал. Нош Центральной площадьын, Пушкин урам кузя Россиысь кинолэн арезлы сӥзем «Фильм, фильм, фильм» нимо театрализованной возьматонъёс ортчизы.

Шоркарлы сӥзем шулдыръяськонъёсы 12 июне пыриськизы Удмурт Элькунлэн тӧроез Александр Соловьёв, Удмурт Элькун Правительствоезлэн Председателез Виктор Савельев, Удмурт Элькунъя ужась Валтӥсь федеральной инспектор Дмитрий Мусин, Ижкарлэн тӧроез Юрий Тюрин, Ижкарлэн думаезлэн Председателез Олег Гарин, Сарапул карлэн тӧроез Александр Ессен, Глаз карлэн тӧроез Олег Бекмеметьев, Удмурт Элькун Правительствоысь ӧнерчиос, Удмурт Элькун Госсоветлэн но Ижкар думалэн депутатъёсыз, озьы ик Ижкарлэн но Удмурт Элькунлэн, Ижкарысь Мерлыко палатаезлэн, мерлыко но национально-культурной огазеяськонъёслэн гажано кунмуртъёссы но ужась коллективъёссы.

- Карлэсь нуналзэ пумитан - Ижкарын улӥсьёслэн уката но яратоно шулдыръяськонзы, - вераз Ижкарлэн тӧроез Юрий Тюрин. – Син азьын ӝог ортчись киноленталэн кадръёсыз музэн ортчизы шулдыръяськонлэн яркыт ужрадъёсыз: Бадӟым хоровой собор, Андрей Дерябинлы сӥзем синпелетэз котырын митинг, чебер театрализованной возьматонъёс, Удмурт Гербер, Ижкар ёросъёсын но Центральной площадьын творческой коллективъёсын радъям концертъёс. Ваньмыз та калыкез шумпоттытӥсь ужрадъёс ӝыт инме ӝутскись фейерверклэн тылъёсыныз йылпумъяськизы. Карлэсь нуналзэ пумитан пӧртэм арлыдо улӥсьёсмес огазея, озьы кармылэсь трос пӧртэм ӧръёсын шоканзэ шӧдыны луэ. Трос аръёс ӵоже асьме арлыдо улӥсьёсмы туж ӟеч сям-йылолъёс пыӵатъязы, соос ик Элькунмылэн шоркарезлэн азьланьсконэзлы сюрес мытӥзы. Арысь аре ижкарчиос тросгес но тросгес луо. Туннэ нунал понна асьмеос 643 сюрслэсь ятыр луиськомы ни! Та лыдпус возьматэ, асьме карамы ӟеч улонлы условиос вань шуыса, экономикамы кужмоя, озьыен азьлань мыныны сюрес ӟеч лёгемын ни шуыса. Гажано ижкарчиос! Россия кунлыкмес кужмоятэмды понна но Ижкармылы сяськаяськыны юрттэмды понна тау кылъёсме верасько котькуддылы! Сӥзисько тӥледлы байлык но шумпотон, сайкыт но лад-лад улон. Нош асьме яратоно кармылэн ӟечлыко историяз мед кылдылозы выль чуръёс но усьяськозы выль бамъёс!

Удмурт Элькунлэн тӧроез Александр Соловьёв, Ижкарысь улӥсьёсты но элькунысь шоркаре лыктэм куноосты ӟечкылакуз пусйиз: «Туж шулдыр луэ, туннэ котырак мынясь но шумпотӥсь адямиосты адӟыса. Милям туннэ вань шулдыръяськон мугъёсмы. Вань мае дунъяны асьме историысьтымы. Заводской каргурт кылдытэм тырысен туннэ нуналозь асьме кармы Быдӟым кунмылэсь утиськонзэ юнматон бордын ужа. Соин ик огшоры гинэ ӧвӧл, асьмелэн Ижкармы Россиысьтымы одӥгез оружейной шоркар нимаське шуыса. Туннэ милям кармы кунмылэн кызь уката но бадӟым каръёсыз пӧлы пыртэмын. Татын потто уката но секыт лэсьтымон продукция нимъёс. Ижкарлэн историез юн герӟаськемын кунмылэн историеныз. Милям шоркармы нокыӵе мукет карлы тупасьтэм, со понна ик ми сое туж яратӥськомы но гажаськомы. Туннэ сюлмысь таукарон кылъёсме верасько нырысь ик Ижкарысь ветеранъёсмылы. Соослэсь ми дышетскиськомы яратыны асьме шоркармес. Угось асьмелы азьланьтоно выжыосмылэсь мытэм ужзэс. Милемлы чеберъяно но шулдыртоно Оӵ шур вылын сылӥсь кармес, утёно синпель интыоссэ но инкуазьмылэсь котыр байлыксэ!».

Удмуртиысь шоркарлэн Центральной площадяз ортчем театрализованной возьматонъёс туэ Россиысь кинолэн арезлы сӥземын вал. Шествиез 9 сюрс ижкарчиос но элькунысьтымы куноос учкыны люкаськизы. Возьматон яркыт гинэ кутскиз, «Молодой человек» нимо муниципал театрысь артистъёс импровизированной киносъёмка возьматӥзы. Учкисьёс адӟизы куд-ог тодмо кинофильмъёслэсь люкетъёссэс: «Белое солнце пустыни», «Кавказская пленница», «Двенадцать стульев», «Фокусник», озьы ик кунгож сьӧрысь классической геройёсты – Чарли Чаплинэз, Мерлин Монроез но мукетъёссэ.

Шествилэн радаз пыриськизы 4 сюрслэсь трос адямиос, соос пӧлын – карлэн котькуд ёросъёсысьтыз предприятиосысь но организациосысь ужасьёс. Индустри ёросысь улӥсьёс кинопроизводстволэсь атмосферазэ кылдытӥзы, режиссёръёслэсь, сценаристъёслэсь но операторъёслэсь ужзэс возьматӥзы. Устинов ёросысь улӥсьёс «Иван Васильевич меняет профессию» тодмо комедиысь геройёс луиллям. Октябрь ёрос учкисьёсты мультипликаци амалъя кылдытэм фильмъёслэн дуннеенызы тодматӥз, озьыен, стресслэсь уката но ӟеч эмъюм кузьмаз. Первомай ёрос «Ижфильм» нимо киноконцерт радъяз, чузъяськизы отечественной фильмъёсысь кырӟанъёс: «Девчата», «Весёлые ребята», «Мы из джаза» но мукетъёсыз. Ваньзэ со возьматонъёсты Ленин ёросысь улӥсьёслэн колонназы йылпумъяз. Соос «Служебный роман» кинолентаысь уката яркыт эпизодъёсты возьматӥзы.

Йылолъя карлэн нуналаз пӧртэм тематической площадкаос ужазы. Котькуд адями, пересь, егит яке нылпи – ваньзы быгатӥзы пыриськыны площадкаослэн ужъёсазы. Соос пӧлын вал «Десткий день города», «Арт-бульвар», «Литературный арбат», «Голос улиц», «Радуга культур» но мукет площадкаос.

«Кызьпу арама» паркын ортчиз удмурт калык шулдыръяськон – Гербер. Куноос быгатӥзы пыраны «Удмурт дунне» азбаре» («Удмурт дунне» газет редакцилэн площадкаез), «Музей азбаре» (Удмурт Элькунысь Кузёбай Герд нимо национальной музейлэн площадкаез). Нырысетӥзэ ужаз «Тодосчи куа» (Россиысь академилэн Урал люкетысьтыз историяя, кылъя но литературая наукаосъя Удмурт институтэзлэн информационной киоскез).

Гербер шулдыръяськонлэн выль люкетэз но туэ вал. «Удмурт Кенеш» огазеяськон «Кырӟась арама» нимо фестивальзэ усьтӥз, кудаз котькуд мылкыд карись кенешчиосын но творческой коллективъёсын уката но тодмо удмурт калык кырӟанъёсты кырӟаны быгатӥз. Учкисьёс но пыриськисьёс понна нимысьтыз кырӟан сборникъёс дасямын вал, репертуарез фестивальын кырӟан понна люкамын. Ӵапак Удмурт Кенешлэн та проектэз 2016 арын некоммерческой но территориальной мерлыко аскивалтэт огазеяськонъёслэн калык понна кулэ луись проектъёссы куспын радъям Городской конкурсын вормисе потӥз.

Карлэн нуналаз озьы ик «Почётный гражданин Ижевска» нимо висьян пусъёс (знак отличия) кузьмамын вал Ижкарлэн нырысетӥ тӧроезлы Анатолий Салтыковлы, Удмурт Элькунысь Госсоветлэн депутатэзлы Михаил Кучерявенколы, технической наукаосъя докторлы, профессорлы, ИжГТУ-ысь «Технология производства систем вооружения» кафедралэн заведующиезлы Олег Шавринлы. Городской думалэн председателез Олег Гарин пусйиз, Ижкарлэсь экономиказэ, мерлыко улонзэ но лулчеберетсэ азьланьтонэз понна почётной званиосты сётонъя решениез Городской думаысь депутатъёс куто.

- Огшоры гинэ ӧвӧл, Россилэсь нуналзэ но Кармылэсь нуналзэ 12 инвожое пусйиськомы шуыса, - пусйиз Олег Гарин. – Туннэ уг ни луы Ижкармес люкыны кунмылэсь, ижкарчиосмы нош туж бадӟым уж быдэстӥзы ни но азьланьто сое. Россиямы понна со туж бадӟым вклад. Ваньдылы сӥзисько тыро-пудо улон но котькуд ужъёсады удалтон.

Ӝыт пал 17.00 часкын ТРК «Столица» (Автозаводская урам, 3а юрт) дорысен кутскиз йылолэ выжем велопробег. Велосипедной спортэз гажасьёс – 3 аресъемъёсысен кутскыса 75 арозь 1,5 сюрс адямиос – ортчизы 8,3 иськем сюресэз. Велопробеглэн маршрутэз: ТРК «Столица» (Автозаводской урам), 10 лет Октября урам, Пушкинская урам, Раздельный переулок, Коммунаров урам, Наговицына урам, Пушкинская урам. Йылпумъяськиз сюрессы 17 час но 40 минутскын Центральной площадьын. Татын ини регистрациез ортчем велопробеге пыриськисьёс куспын дуно кузьымъёсын розыгрыш ортчытэмын вал. Валтӥсь кузьым – велосипед.

Шулдыръяськонлы сӥзем ужрадъёс ортчизы карлэн пӧртэм интыосаз – Космонавтъёслэн парказы, М. Горький нимо летний садын, Удмуртиысь зоопаркын, «Спартак» нимо калык творчестволэн юртэз азьын (Азина урам, 84 юрт), «Радуга» нимо торговой центрлэн площадкаосаз (Ленина урам, 140 юрт), «Магнит» гипермаркет азьын (Молодёжная урам, 107а юрт).

Концертной площадкаосын карлэн уката но ӟеч творческой коллективъёс выступать каризы. Ижкарлэн Центральной площадяз интыям валтӥсь сценаысен учкисьёс понна кырӟаз популярной кырӟась Зара, «Золотой граммофон» нимо национальной музыкальной премиен вить пол пусъем артистка. Концерт кутскиз 20.00 часкын.

Элькунмылэн шоркарезлэн нуналыз Ижкар пруд вылын усьтӥськем праздничной фейерверкен йылпумъяськиз. 400 пала «тылсяськаос» ворекъязы яратоно Ижкармылэн ӝыт инбамаз.




Информационно-аналитическоe управление Администрации города Ижевска © 1998-2017г.

При любом использовании материалов сайта ссылка на www.izh.ru обязательна
вход авторов,